ما نسيت

(ا)
مانسيت..
ولو يكون الشارع اللي
مر من تحتي ..نساني !
مانسيت
ولو نسى النسيان نفسه -
وجا يدور عن حناني .
مانسيت
لكن الأيام غيم، وريح ، وانسان يعاني.
التهاني للبعيد ..
وللقريب من الوريد ..
أقبل العيد السعيد -
وجا لوحده ..
ما احتراني ..!
(2)
غبت لكن ..
كل يوم أصحى على ريحة هلي .
وعطر طيبتهم يفوح
وينتشي في داخلي .
يا صديقي ، يا علي :
وش الذ من الصباح ، وفيه شمس الكون تشرح.
وسيرة أحبابي وهي تسرح وتمرح ..
وتشغل القلب الخلي ..؟!
وش الذ من السهر ..
وصورة حبيبي بالقمر ..
تقول يابعد العمر ..
اشتقت لك ، ما اشتقتلي ؟
ويا زماني يا زماني ..
وش ألذ من الأماني ؟! .
مانسيت .
(3)
كل حر وله سما ..
وآنا سماي إنتي وأرضي .
وين ما آهاجر ، كما –
ظلي ، كما كلي وبعضي .
أرتحل ، بس إنتي قدامي
و أشتعل شمعة لك ونامي
وانعسك والقاكِ باحلامي-
وأقول يا حظي .
والله اني ماسليتك ..
مانسيتك ..
ولابقى غيرك بوجداني .
يا الذ من الأماني
مانسيت

* من روائع: صالح الشادي